Tras un exhaustivo proceso de avaliación, o Consello de Universidades ditou resolución pola que se renova a acreditación do Programa de Doutoramento en Investigación en Tecnoloxías e Procesos Avanzados na Industria pola Universidade de Vigo.
De conformidade co disposto no artigo 10 do Real decreto 99/2011, do 28 de xaneiro, polo que se regulan os estudos oficiais de doutoramento, a Universidade de Vigo remitiu á “Secretaría Xeral de Universidades” da “Xunta de Galicia” a solicitude do proposta de renovación da acreditación do título “Programa de Doutoramento en Investigación en Tecnoloxías e Procesos Avanzados na Industria” co fin de que a ACSUG comprobe que o plan de estudos se está a realizar conforme á descrición e compromisos que figuraban no proxecto que, por este título, foi aprobado no proceso de comprobación.
A avaliación foi realizada por unha subcomisión derivada da Comisión de Avaliación da rama de coñecemento de Enxeñaría e Arquitectura formada por expertos nacionais e internacionais do ámbito académico, profesionais e estudantes. Os membros desta comisión foron seleccionados e nomeados segundo o procedemento que se recolle na páxina web da ACSUG.
Este informe é o resultado da avaliación do conxunto de probas documentais do título e da visita ao centro onde se imparte a titulación, que se realizou sen incidencias segundo o calendario previsto, e da revisión do Plan de mellora presentado polo centro unha vez recibido o informe provisional de avaliación para a renovación da acreditación. As actuacións incluídas no devandito Plan de Mellora serán obxecto de especial revisión durante o proceso de seguimento do título.
Este informe destaca os seguintes como os principais puntos fortes do programa:
- Implicación e dedicación dos responsables do título, así como de todo o profesorado.
- Estreita relación entre alumnado e profesorado, apoiada nunha proporción favorable profesor/alumno.
- Teses de doutoramento avaladas por unha altísima produción de achegas científicas.
- Os recursos materiais e bibliográficos son valorados positivamente por todas as partes interesadas.
- Interesante nivel de internacionalización, destacando a presenza de membros internacionais nos tribunais.
- O apoio administrativo foi ben valorado por todas as partes interesadas.
- Recoñécese o esforzo realizado polo programa para manter o contacto cos titulados e recoller información sobre a súa inserción laboral.
