Mestrado en Enxeñería Industrial

120 Créditos

2 Cursos

50 Prazas

Presencial

Habilitante

Descrición do título

Segundo o artigo 16.1 do Real Decreto 822/201, polo que se establece a ordenación das ensinanzas universitarios oficiais e o procedemento de garantía da calidade, “A docencia que se imparte nos mestrados ten por obxecto que o alumnado dispoña dunha formación avanzada, especializada ou multidisciplinar, orientada á formación académica ou especialización profesional, ou na promoción dunha iniciación ao labor investigador”.

Determinadas profesións reguladas necesitan un nivel de estudos maior e así, para poder exercelas, requírese cursar un mestrado universitario habilitante. O Mestrado en Enxeñería Industrial é un Mestrado con atribucións profesionais plenas de Enxeñeiro Industrial, regulado pola Orde Ministerial CIN/311/2009 do 9 de febreiro de 2009 e publicada no BOE nº 42 de 18/02/2009.

A Comisión de Acreditación de Enxeñería (EAC) de ABET avaliou o programa de Mestrado de Enxeñería Industrial da Escola de Enxeñería Industrial da Universidade de Vigo para a súa acreditación inicial. Coma resultado desta avaliación, o Programa Educativo de Mestrado en Enxeñería Industrial está acreditado pola Comisión de Acreditación de Enxeñería (EAC) de ABET, https://www.abet.org, baixo os Criterios Xerais e os Criterios para Programas de Enxeñería Industrial.

O Mestrado habilitante da Escola de Enxeñería Industrial foi deseñado a partir dun determinado grao de referencia, o Grao en Enxeñería en Tecnoloxías Industriais e xuntos (grao + mestrado) configuran un programa integrado de estudos.

Consta dun total de 120 ECTS, repartidos en 5 módulos e un Traballo Fin de Mestrado:

Módulo Obrigatorio (6 ECTS)
Módulo de Tecnoloxías Industriais (30 ECTS)
Módulo de Instalacións, Plantas e Construcións (15 ECTS)
Módulo de Xestión (15 ECTS)
Módulo de Adaptación / Módulo de Orientación (30 ECTS)
Traballo Fin de Mestrado (24 ECTS)

Obxectivos

Estes están contidos no Real Decreto 822/2021, do 28 de setembro, e no Real Decreto 1393/2007, do 29 de outubro, e a Orde CIN 311/2009, do 9 de febreiro, pola que se establecen os requisitos para a verificación dos títulos universitarios oficiais que habiliten aos seus titulares para o exercicio da profesión de enxeñeiro industrial en España:

Para obter o título, o estudante debe amosar os seguintes resultados de aprendizaxe.

Ter coñecementos adecuados dos aspectos científicos e tecnolóxicos de: métodos matemáticos, analíticos e numéricos na enxeñería, enxeñería eléctrica, enxeñería enerxética, enxeñería química, enxeñería mecánica, mecánica de medios continuos, electrónica industrial, automática, fabricación, materiais, métodos cuantitativos de xestión, informática industrial, urbanismo, infraestruturas etc.
Proxectar, calcular e deseñar produtos, procesos, instalacións e plantas.
Dirixir, planificar e supervisar equipos multidisciplinares.
Realizar investigación, desenvolvemento e innovación en produtos, procesos e métodos.
Realizar a planificación estratéxica e aplicala a sistemas tanto construtivos como de produción, de calidade e de xestión ambiental.
Xestionar técnica e economicamente proxectos, instalacións, plantas, empresas e centros tecnolóxicos.
Poder exercer funcións de dirección xeral, dirección técnica e dirección de proxectos I+D+i en plantas, empresas e centros tecnolóxicos.
Aplicar os coñecementos adquiridos e resolver problemas en contornas novas ou pouco coñecidos dentro de contextos máis amplos e multidisciplinares.
Ser capaz de integrar coñecementos e enfrontarse á complexidade de formular xuízos a partir dunha información que, sendo incompleta ou limitada, inclúa reflexións sobre as responsabilidades sociais e éticas vinculadas á aplicación dos seus coñecementos e xuízos.
Saber comunicar as conclusións –e os coñecementos e razóns últimas que as sustentan– a públicos especializados e non especializados dun modo claro e sen ambigüidades.
Posuír as habilidades de aprendizaxe que permitan continuar estudando dun modo autodirigido ou autónomo.
Coñecemento, comprensión e capacidade para aplicar a lexislación necesaria no exercicio da profesión de Enxeñeiro Industrial.

Competencias da titulación

O Mestrado en Enxeñería Industrial está especificamente deseñado para preparar a enxeñeiros industriais, dotándoos dunha serie de competencias adecuadas ás esixencias da profesión que van desempeñar e para a que habilita o título.

Os estudantes deben adquirir estas competencias que son necesarias para outorgar o título.

Pódense consultar neste apartado: Competencias MEI.