Convocadas dúas bolsas de formación na Escola de Enxeñaría Industrial para o curso 2026/2027

A Universidade de Vigo publicou a convocatoria de bolsas de formación en centros universitarios para o curso 2026/2027, entre as que se inclúen dúas bolsas de formación na Escola de Enxeñaría Industrial destinadas á colaboración en actividades de divulgación científica e de difusión das iniciativas da Escola.

As persoas seleccionadas colaborarán na organización de eventos científicos relacionados coas titulacións impartidas na Escola, así como na creación e elaboración de material divulgativo e de contidos destinados á difusión e visibilidade das actividades e proxectos desenvolvidos pola EEI.

Poderá optar a estas bolsas o estudantado matriculado nalgunha titulación oficial de grao ou máster universitario do Campus de Vigo que cumpra os requisitos establecidos na convocatoria. 

As bolsas desenvolveranse entre o 16 de outubro de 2026 e o 30 de xuño de 2027, cunha dedicación de 15 horas semanais, compatible coa actividade académica.

As solicitudes presentaranse a través da Sede Electrónica da Universidade de Vigo, empregando o procedemento habilitado para este fin.

O prazo de presentación permanecerá aberto ata o 31 de xullo de 2026 ás 23:59 horas.