Descrición do Programa Académico
O PARS en Enxeñería Biomédica é un Programa académico con percorrido sucesivo en Mestrado en Enxeñería Biomédica vía Grao en Enxeñería Biomédica.
Este programa pretende a flexibilización do acceso ao Mestrado en Enxeñería Biomédica (MEB) dende o Grao en Enxeñería Biomédica (GEB), xa que permite encadear os estudos sen solución de continuidade. Desta forma, o alumnado pode comezar o Mestrado sen ter rematado o Grao. Esta flexibilidade pode reducir o tempo total para completar a formación de Grao máis Mestrado.
Competencias do Programa Académico
O alumnado que remate o programa terá acadado as competencias do Grao en Enxeñería Biomédica e as competencias do Mestrado en Enxeñería Biomédica.
Perfil de ingreso recomendado
O perfil de ingreso recomendado no referido a habilidades, capacidades e coñecementos previos será o mesmo que o recomendado para o Grao en Enxeñería Biomédica.
O acceso ao PARS en Enxeñería Biomédica realízase a través dunha oferta de prazas específica, tal e como aparece no artigo 7 da normativa PARS da Universidade de Vigo. O número de prazas específicas ofertadas para este Programa é de 8.
Tal e como indica o RD822/2021 na disposición adicional novena, o alumnado que opte por matricularse neste PARS poderá abandonalo en calquera momento dos seus estudos de Grao ou Mestrado.
Na admisión ao Mestrado en Enxeñería Biomédica, garantirase a prioridade na matrícula do alumnado que dispoña do título oficial de Grao, indistintamente de se están cursando, ou non, o PARS.
No caso de ter máis solicitudes que prazas, a Comisión Académica do Mestrado resolverá seguindo a prelación indicada no artigo 7 normativa PARS da Universidade de Vigo.
Tal e como establece o RD 822/2021, o alumnado do PARS pode ser admitido no Mestrado en Enxeñería Biomédica se lle restan por superar, como moito, 30 créditos do Grao en Enxeñería Biomédica (incluíndo o TFG).
Estes 30 créditos ECTS non poderán ser ningún dos etiquetados no plan de estudos do GEB como:
- Formación Básica e Formación Obrigatoria Biomedicina (FB e FOB) (60 e 15 créditos ECTS)
- Rama Industrial aplicada a Enxeñería Biomédica (RIIB) (60 créditos ECTS).
- Tecnoloxía especifica Enxeñería Biomédica (TE) (39 créditos ECTS).
- Prácticas de Tecnoloxía Hospitalaria (PE) (6 créditos ECTS)
Polo tanto, poderán formar parte deses 30 créditos ECTS:
- Calquera das materias optativas xerais (OG) ou as prácticas en empresa (PE) de 4º curso do GEB (6 créditos ECTS).
- O Traballo Fin de Grao (TFG) (12 créditos ECTS).
- Calquera das materias optativas da intensificación BIOTECH (BT) o da intensificación BIOMMEC (BM) de 3º e 4º curso recollidas nas táboas:
| Curso | Materias de BIOTECH (BT) | Créditos ECTS |
| 3 | Técnicas de procesado de sinais biomédicas | 6 |
| 3 | Dispositivos electrónicos dixitais en medicina | 6 |
| 4 | Xeración e procesado de imaxe en biomedicina | 6 |
| 4 | Redes de comunicacións, manipulación e telemedicina | 6 |
| 4 | Sistemas automáticos de control en biomedicina | 6 |
| 4 | Instrumentación biomédica | 6 |
| 4 | Sistemas de información en entornas biomédicos | 6 |
| Curso | Materias de BIOMMEC (BM) | Créditos ECTS |
| 3 | Biomateriais | 6 |
| 3 | Biomecánica | 6 |
| 4 | Biocompatibilidade e comportamento mecánico de materiais en implantoloxía | 6 |
| 4 | Deseño e fabricación de produtos e equipos biomédicos | 6 |
| 4 | Instalacións hospitalarias | 6 |
| 4 | Simulación aplicada a fluídos e sistemas mecánicos | 6 |
| 4 | Nanomedicina | 6 |
